အာဖရိကန်လူမျိုးကို နီကရိုးလို့ခေါ်လျှင် အာဖရိကန်တွေ မကြိုက်ကြပါဘူး။ ၎င်းတို့ကို နှိမ်၍ခေါ်သည်ဟု ၎င်းတို့မှခံစားရပါသည်။ မြန်မာနိုင်ငံမှာမွေးသည့် တိုင်းတစ်ပါးသား မျိုးနွယ်များကို ကုလားဟု၊ ပေါက်ဖော်ဟု ခေါ်လျှင်၎င်းတို့မကြိုက်သလို၊ မြတ်စွာဘုရားကို ကုလားကြီးလို့ခေါ်လျှင် မြန်မာလူမျိုးများလည်းမကြိုက်ကြပါ။ လူတစ်မျိုးနှင့်တစ်မျိုး တစ်ကမ္ဘာတည်းနေပြီး တစ်ဦးကိုတစ်ဦး လေးစားမှု (respect) ရှိကြမှသာလျင် တိုင်းပြည်လည်း ငြိမ်းချမ်းမှုဆိုတာ ရှိနိုင်ပါမည်။
မိမိ မိသားစုဝင်ဖြစ်စေ၊ အိမ်နီးချင်းဘဲဖြစ်စေ၊ ဆွေမျိုးသားချင်းဘဲဖြစ်စေ အမြင်ကျဉ်းမြောင်းနေလျင် မိမိဖက်က အမှန်ကိုပြသရမည်။
လူများတွင်သတိ လက်လွတ်ဖြစ်တတ်ကြပြီး ''ငါ'' ဟူသော အတ္တစိတ် အနဲနှင့် အများရှိကြသည်။ ဗုဒ္ဓမေတ္တာတရား နှလုံးမသွင်းနိုင်ပါက ထိုသူသည် ကျဉ်းမြောင်းသော လူမျိုးကြီးဝါဒလွှမ်းမိုးကာမျက်ကန်းမျိုးချစ်ဖြစ်လာမည်။
သီတဂူဆရာတော်၏ ကဗျာကိုသတိရစေရန် ထည့်ပေးလိုက်ပါသည်။
ငါတို့ဖြစ်ရ ဤလောကဝယ်
ဘဝသမိုင်း မရိုင်းစေရန်
စိတ်မာန်မချ မာနမပါ
တို့စွမ်းရာဖြင့်
တို့သာသနာ တို့ပြည်ရွာကို
သာယာစေမှု လုံ့လပြုအံ့။
ကျဉ်းမြောင်းသောလူမျိုးရေးဝါဒီ နှင့် လူမျိုးကြီးဝါဒဆိုသည်မှာအဘယ်နည်း ?
ကျဉ်းမြောင်းသောလူမျိုးရေးဝါဒီများ
ကျဉ်းမြောင်းသောလူမျိုးရေးဝါဒီကို ဆွဲကိုင်ထားသူများသည် မိမိတို့ကိုယ်ကျိုးသက်သက်အတွက် လူမျိုးတစ်မျိုးနှင့်တစ်မျိုး မုန်းတီးမှုစိတ်ပွါးကာ ပေါင်းသင်းဆက်ဆံ၍မရအောင်ခွဲခြားလျက် ထာဝရဖိနှိတ်ကျွန်ပြုလိုသူများဖြစ်သည်။ ထိုကျဉ်းမြောင်းသောလူမျိုးရေးဝါဒီများသည် ကွဲပြားသော လူမျိုးအသီးသီးအား အမြဲသွေးခွဲရန်ကြိုးစားအားထုတ်လျက်ရှိသည်။
၎င်းဝါဒီများသည် မိမိတို့လူမျိုးပင်လျင် အလွန်မြင့်မြတ်ပြီး ကောင်းကင်ဘုံမှဆင်းသက်လာသယောင် အထင်မှားသောစိတ်ရောဂါသည်များဖြစ်သည်။ တို့နောက် မိမိတို့လူမျိုးပင်လျင် အခြားဘာသာဝင်လူမျိုးများထက် သန့်စင်တန်ဘိုးရှိသည်ဟု ရူးသွပ်အထင်ကြီးသူများဖြစ်သည်။ ထိုသူတို့သည် ၎င်းတို့၏မိသားစုအကျိုးစီးပွါးကို မိမိတို့လူမျိုးများကသာကာကွယ်မည်ဟု အယုံကြီးသူများဖြစ်သည်။ အခြားလူမျိုးများကို မိမိတို့ရန်သူများဟု အမြဲသတ်မှတ်တတ်သော စိတ်ဝေဒနာရှင်များဖြစ်သည်။
လူမျိုးကြီးဝါဒ
လူမျိုးကြီးဝါဒများသည် မိမိတို့လူမျိုးသာ အမြင့်မြတ်ဆုံးဖြစ်ပြီး မိမိတို့လူမျိုးအတွင်း၌ပင် မိမိ၏မိသားစုနှင့် မိမိ မိသားစုအကျိုးကို အကာအကွယ်ပေးသူများသည်သာ အမြတ်ဆုံးဟု ယုံကြည်သူများဖြစ်သည်။ လူမျိုးကြီးဝါဒီများသည် အလွန်အတ္တဆန်ပြီး မိမိတို့နှင့် မိမိတို့အကျိုးကိုဖြည့်ဆည်းပေးသူများသာလျင် အုပ်ချုပ်ရေးယန္တယားကို ချုပ်ကိုင်ပြီး အခြားလူမျိုးနှင့် အခြားဘာသာဝင်များကို ထာဝရနှိပ်ကွပ် ကျွန်ပြုအုပ်ချုပ်လိုသူများဖြစ်သည်။
တိုင်းပြည်နှင့်လူမျိုး
ဤကမ္ဘာကြီးတွင် ဘာသာတစ်ခုတည်းကိုသာ ကိုးကွယ်ပြီး လူမျိုးတစ်မျိုးတည်းသာနေထိုင်သော တိုင်းပြည်ဟူ၍ ရှာတွေ့ရန်အလွန်ခက်ခဲလိမ့်မည်။ ကြီးသောနိုင်ငံဖြစ်စေ ငယ်သောနိုင်ငံဖြစ်စေ နိုင်ငံသားများသည် မျိုးရိုးအများအပြားနှင့် ကိုးကွယ်သည့်ဘာသာ အများအပြားရှိကြသည်။
တစ်နည်းဆိုရလျင် ဤကမ္ဘာပေါ်၌ မျိုးရိုးတစ်မျိုးတည်းနှင့်ဖြစ်စေ ဘာသာတစ်ခုတည်းဖြင့်ဖြစ်စေ ဖွဲ့စည်းထားသောနိုင်ငံဟူ၍မရှိပေ။ ဘာသာတစ်ခုတည်းမှာပင် ဂိုဏ်းကွဲများစွာရှိတတ်ကြပေသည်။ တို့ကြောင့် ကမ္ဘာပေါ်ရှိနိုင်ငံတိုင်းတွင်ကွဲပြားခြားနားသော ဘာသာအယူဝါဒကို ကိုးကွယ်သည့်လူမျိုး အမျိုးမျိုးရှိကြသည်ချည်းဖြစ်ပေသည်။ ထိုလူမျိုးများမှာလည်း မျိုးရိုးအများအပြားမှ ဆင်းသက်လာသူများဖြစ်ကြသည်။
ငြိမ်းချမ်းပြီး ချမ်းသာကြွယ်ဝသောတိုင်းပြည်
နိုင်ငံတစ်ခုအနေဖြင့် တည်ငြိမ်ပြီးကြီးပွါးချမ်းသာရန်မှာ ထိုနိုင်ငံကိုအုပ်ချုပ်သော အစိုးရဆိုသည်များ၏အပေါ်တွင် လုံးဝမှီတည်ပါသည်။ ထိုအစိုးရများသည် မိမိတို့တိုင်းသူပြည်သားများကို ဘာသာရေး လူမျိုးရေးအရ ကျောသားရင်သားမခွဲခြားဘဲ တရားမျှစွာအုပ်ချုပ်သည့် အစိုးရများဖြစ်သည်။ ထိုသို့ သော အစိုးရကောင်းများအုပ်ချုပ်သော တိုင်းပြည်သည် ဧကန်မုချအေးချမ်းသာယာမည်ဖြစ်သည်။ ထိုအစိုးရများသည် တိုင်းပြည်၏ သယံဇာတပစ္စည်းများကို ခိုးယူရောင်းချခြင်းမရှိ။ တိုင်းသူပြည်သားများအနေဖြင့် လွတ်လပ်စွာလုပ်ကိုင်စားသောက်နိုင်သာ တိုင်းပြည်သည်ချမ်းသာကြွယ်ဝပြီးငြိမ်းချမ်းသာယာမည်ဖြစ်သည်။
ဘာသာမတူရုံ၊ လူမျိုးမတူရုံဖြင့် ထိုလူမျိုးများကို အစိုးရဆိုသည်များက ဖိနှိတ်ညှဉ်းဆဲရန် အကြောင်းဖန်တီးပြီး ရက်စက်စွာအုပ်ချုပ်ရန်အကွက်ရှာခြင်းဖြင့် အလုပ်များနေသော အစိုးရဆိုသည်တို့ အုပ်ချုပ်သောတိုင်းပြည်သည် မည်သည့်အခါမျှ တည်ငြိမ်ခြင်း၊ ငြိမ်းချမ်းသာယာခြင်းမရှိနိုင်ပေ။
ထို့ပြင်လူမျိုးစုံ ဘာသာစုံ ရှိနေသည်ကိုပင် သည်းခံနိုင်ခြင်းမရှိ မကျေနပ်ဖြစ်ကာ ဒေါသဖြစ်ပွါးနေလျင် မည်သည့်အခါမျှမတည်ငြိမ်နိုင်ပေ။
နိုင်ငံတစ်ခုတွင် မျိုးရိုးအားဖြင့်ကွဲပြားခြားနားသော လူမျိုးအားလုံးကိုစုပေါင်ပြီး နိုင်ငံရေးအရအချုပ်အခြာပိုင်နိုင်ငံအဖြစ် ဖွဲ့စည်းထားလျင် ထိုလူမျိုးအားလုံးကို တန်းတူအခွင့်အရေးပေးအပ်ရန်လိုအပ်သည်။ သို့မှသာထိုလူရမျိုးအားလုံးသည် ထိုအစိုးရအပေါ်တွင် ကျေနပ်မှုရှိမည်ဖြစ်သည်။ တိုင်းပြည်မှာလည်း ကြီးပွါးချမ်းသာပြီး ငြိမ်းချမ်းသာယာမည်ဖြစ်သည်။
လူမျိုးကြီးဝါဒီတို့သည် သူတို့၏ အစွမ်းအစဖြင့် သူတို့ အုပ်ချုပ်သောနယ်မြေ၏ တည်ငြိမ်မှုကို မဆောင်ရွက်နိုင်သောအခါ အခြားလူနည်းစုများကို ပုံစံအမျိုးမျိုးနှင့်စွပ်စွဲပြီး နှိပ်ကွပ်တတ်သည်။ လူမျိုးကြီးဝါဒီတို့သည် အခြားလူမျိုးများအား အမြဲဆိုသလို '' သံသယ '' မျက်စေ့ဖြင့် ကြည့်ရှူတတ်ကြသည်။ ၎င်းတို့သည် ၎င်းတို့၏အခွင့်အာဏာကို ထိပါးမည်ထင်လျင် လူအများအပြားကိုသတ်ဖြတ်ရန် ဝန်မလေးသူများဖြစ်သည်။ ၎င်းတို့သည် ပါးကွက်အာဏာသား အုပ်စုကိုမွေးမြူပြီး တစ်ပြည်လုံးကို ကျွန်ပြုတတ်သည်။
မြန်မာတို့အတွက် အကောင်းဆုံးစံနမူနာအဖြစ် စင်္ကာပူနိုင်ငံကို လေ့လာနိုင်ပါသည်။ ၎င်းနိုင်ငံသည် ဗုဒ္ဓဘာသာ၊ ခရစ်ယာန်၊ မူစလင်မ်၊ ရှင်တို၊ ဂျူး၊ ဟိန္ဒူ၊ ဆစ်ခ်ဟူ၍ ဘာသာပေါင်းစုံ စုပေါင်းနေထိုင်သော သေးငယ်လှသော ကျွန်းငယ်လေးတစ်ခုဖြစ်ပါသည်။ ဘာသာဝင်အားလုံး၊ လူမျိုးအားလုံးသည် တစ်ဦးကိုတစ်ဦးအထူးလေးစားစွာဆက်ဆံကြသည်။ သူတို့အတွက်အရေးကြီးဆုံးအချက်သည်ကား သူတို့နိုင်ငံတိုးတက်နိုင်မည့် နည်းလမ်းသာဖြစ်သည်။ ၎င်းနိုင်ငံရှိ ဘာသာဝင်အားလုံးတို့သည် မိမိတို့ကိုယ်ကို '' ဆင်ဂါပူရီယန်'' ဟူ၍ခေါ်ဆိုခြင်းဖြစ်သည်။ သူတို့သည် ကမ္ဘာပေါ်မှာဂုဏ်ရှိစွာ ဦးမော့နေနိုင်ခြင်းမှာ တူညီသော နိုင်ငံချစ် စိတ်ဓာတ်ကြောင့်ဖြစ်သည်။.. မြန်မာနိုင်ငံသည် ဗုဒ္ဓဘာသာဝင်အများစုနေထိုင်သောနိုင်ငံဖြစ်သည်။ တို့ကြောင့် ဗုဒ္ဓ၏မေတ္တာတရား မမေ့မပျောက်စေဘဲ နောင်တော်ကြီးစိတ်ဓာတ်မွေးမြူကာ လူမျိုးစု ညီငယ်လေးများကို သနားညှာတာသွားမည်ဆိုပါလျင်မူ လူမျိုးစုငယ်များသည် အစ်ကိုကြီးနောက်သို့ တကောက်ကောက်လိုက်ပါသွားမည်မှာ မုချအမှန်ပင်ဖြစ်သည်။ (သံအမတ်ကြီးတစ်ဦး)
နိဂုံး : လူများသည်အသားအရောင် ဘာသာစကား သာသနာ လူမျိုး ယဉ်ကျေးမှုများ ကွာခြားနေသော်လည်း လူ့အခွင့်အရေး လူ့တန်ဖိုး လူအချင်းချင်းပေါင်းသင်းဆက်ဆံမှုများတွင် သာတူညီမျှကြသည်။
(ရောင်ခြည်ဦး)
No comments:
Post a Comment