မြတ်စွာဘုရားသည် မုန်းတီးမှု၏အကျိုးတရားများကို ကောင်းစွာ သိနားလည်သည့် ပုဂ္ဂိုလ်တစ်ဦးဖြစ်သည်။ မုန်းတီးမှုဟူသော အကြောင်းကြောင့် မိမိတို့၏ ဘဝကို ဖျက်ဆီးလိုက်ကြသောသူတို့ကို မြတ်စွာဘုရားမြင်တွေ့တော်မူခဲ့သည်။ ဤအကြောင်းကြောင့် မြတ်စွာဘုရားသည် '' မုန်းတီးမှုကြောင့် မုန်းတီးမှုသည် မပြီးဆုံးနိုင် '' '' သင်အမုန်းပွါးလေလေ အခြေအနေပိုဆိုးရွားလေလေ'' ဖြစ်ကြောင်းကို ပြတ်ပြတ်သားသားမိန့်ကြားနိုင်ခဲ့သည်။သင်ကကျွန်ုပ်ကိုမုန်း၏။ ကျွန်ုပ်ကသင့်ကိုမုန်း၏။ ကျွန်ုပ်ကသင့်ကိုပိုမုန်းလာ၏။ ဤသို့ဖြင့် မုန်းတီးမှုက တဆင့်ဆင့်တိုးပွါးလာရာ သင်နှင့် ကျွန်ုပ်တို့သည် ကျွန်ုပ်တို့အချင်းချင်းမုန်းတီးမှုဟူသော မီးလောင်တိုက်တွင် လောင်မြိုက်ခြင်းခံရသည်အထိဖြစ်၏။ ဤပြဿနာကို ဖြေရှင်းရန် တစ်ခုတည်းသောနည်းလမ်းမှာ တဘက်ဘက်က အမုန်းပွါးမှုကို ရပ်တန့်ရန်ဖြစ်ကြောင်း မြတ်စွာဘုရား မြင်တော်မူ၏။
တဘက်ဘက်ကဖြစ်စေသို့မဟုတ် နှစ်ဘက်စလုံးကဖြစ်စေ၊ မုန်းတီးမှုကိုမိတ်ဖြစ်မှုနှင့် သို့မဟုတ် ချစ်ခင်မှုနှင့် အောင်နိုင်အောင်မကြိုးစားလျှင် ဤမုန်းတီးမှု အစဉ်အတန်းသည် မည်သည့်အခါမျှ ဆုံးခန်းတိုင်မည် မဟုတ်ချေ။ (ဒေါက်တာမင်းတင်မွန်၊ ဗုဒ္ဓဝါဒနှင့် ခေတ်သစ်ဘဝ၊ စာမျက်နှာ ၅၅-၅၆)
ဘုံပျောက်မှာစိုးကြောက်မိရှာ နောက်ဆက်တွဲ အပိုင်း ၆
ယနေ့ခေတ်ကာလတွင် ကုလ္လသမဂ္ဂမှကြီးမှူး၍ဖွဲ့စည်းထားသော ကုလ္လသမဂ္ဂဒုက္ခသည်များ မဟာမင်းကြီးရုံးကရှိနေသည်။ ယင်းသည်ပဋိပက္ခဖြစ်ပွါးရာဒေသအထိကွင်းဆင်းကာ ဝင်ရောက်ဖြေရှင်းရုံမကအတော်ကြာသည်အထိ ယင်းဒေထွန်းတွင်ဝင်ရောက်စောင့်ကြပ်ပေးသည်။ ဥပမာ-ရိုဟင်ဂျာ၊ ဘော့စနီးယားကိစ္စကိုကြည့်ပါ။ ဤဖော်ပြပါအချက်များသည် ကျွန်တော်တို့၏ ရိုးသားလှသော ဗုဒ္ဓဘာသာဝင်များသိရှိရန်ဖော်ပြလိုက်ရခြင်းဖြစ်ပါသည်။ သူများမြှောက်ပေးတိုင်းလိုက် '' က '' လျင် ကျွန်တော်တို့နိုင်ငံသာလျင်ပြိုကွဲပျက်စီးရမည် မလွဲဖြစ်သည်။ ကျွန်တော်တို့အတွက် အရေးကြီးဆုံးပြုရမည့်အချက်သည်ကား နိုင်ငံတော်တည်တံ့ခိုင်မြဲပြီး၊ အမျိုးသားစည်းလုံးညီညွတ်ရေး မပြိုကွဲရေးပင်ဖြစ်သည်။
'' အမျိုးပျောက်မှာစိုးကြောက်ရ'' စာတမ်းတွင် အချို့သောအချက်အလက်များသည် မူဆလင်တို့ကို စိတ်ဓာတ်တက်ကြွရန်နှင့် နိုင်ငံရေးအရ အခွင့်အရေးတောင်းရန် တဖက်မှလှုံ့ဆော်ပေးသကဲ့သို့ဖြစ်နေသည်။ ဗြိတိသျှအစိုးရလက်ထက်မှစ၍ ယနေ့အထိ နိုင်ငံတော်အစိုးရ၏ ထုတ်ပြန်ချက်အရ မြန်မာနိုင်ငံတွင် အစ္စလာမ်ဘာသာဝင်တို့သည် ၃.၈% ရှိသည်ဟု သိရသော်လည်း '' မျိုးပျောက်မှာစိုးကြောက်ရ '' တွင်မူ အစ္စလာမ်ဘာသာဝင်ဦးရေသည် ၂၀ % ရှိနေပြီဖြစ်ကြောင်း၊ အကယ်၍ ၅၀ % သို့ရောက်လာလျင် ဗုဒ္ဓဘာသာဝင်တို့ကို ဤနိုင်ငံမှ နှင်ထုတ်မည်ဖြစ်ကြောင်း ရေးသားထားသကဲ့သို့ သက္ကရာဇ် ၂၀၂၀ ပြည့်နှစ်တွင် မူဆလင်တွင်သည် ဟိန္ဒူများကို ကျော်သွားလိမ့်မည်ဟု ရေးသားထားသည့်ပုံစံအတိုင်းဖြစ်နေသည်။ အချို့အချို့သော စာရင်းဇယားများသည် နိုင်ငံတော်၏ ထိပ်တန်းလျှို့ဝှက်ချက်များဖြစ်၍ပြင်ပသို့ထုတ်ဖော်ပြသခြင်းမရှိပါ။ ယင်းအချက်ကို စာတမ်းပြုသူများ တကယ်ပင်နားမလည်ကြခြင်းလော။ သို့တည်းမဟုတ် ငနားမလည်ချင်ယောင်ဆောင်နေသလောဟု စဉ်းစားစရာဖြစ်လာသည်။ နိုင်ငံရေးအနှောက်အယှက် ပယောဂမကင်းဟု ယူဆရမည်ပင်။
ဤကဲ့သို့သော ရေးသားချက်၊ ထိုးနှက်ချက်များကြောင့်ပင် ယူဂိုဆလပ်နိုင်ငံသည်ပြိုကွဲခဲ့ရသည်။ ဘော့စနီးယားနိုင်ငံ၊ တဖန် ကိုဆိုဗိုကို ခွဲထုတ်ရန် ကြိုးစားခဲ့ကြသည်။ ယူဂိုဆလပ်နိုင်ငံပြိုကွဲရခြင်းမှာ ကျဉ်းမြောင်းသော အမျိုးသားရေးဝါဒနှင့် ဆာ့ဗ်တို့၏ မဟာလူမျိုးကြီးဝါဒကြောင့်ပင်ဖြစ်သည်။ နိုင်ငံတစ်နိုင်ငံဆိုသည်မှာ ယင်းနိုင်ငံ၏နယ်နမိတ်အတွင်း နေထိုင်သူများ၏လွတ်လပ်ခွင့်နှင့် အခြေခံလူ့အခွင့်အရေး ပြည့်ဝမှုနှင့်ဆိုင်သည်။ ယနေ့ခေတ်ကာလတွင် မည်သည့်လူမျိုးမှ အခြားလူမျိုးကိုကျွန်ပြု၍မရနိုင်ပါ။ သို့ပါ၍မေတ္တာဝါဒီ ဗုဒ္ဓဘာသာဝင်ပီပီ နောင်တော်ကြီးစိတ်ဓာတ်မွေးမြူကာ လူမျိုးစုညီငယ်လေးများကို သနားညှာတာသွားမည်ဆိုပါလျှင်မူ လူမျိုးစုငယ်များသည် အစ်ကိုကြီးနောက်သို့ တကောက်ကောက်လိုက်ပါသွားမည်မှာ မုချအမှန်ပင်ဖြစ်သည်။
မြန်မာနိုင်ငံတွင် ယခုရှိနေသော မူဆလင်များသည် ဗမာလူမျိုးကိုမှပို၍အထင်ကြီးကြသည်။ သို့ဖြစ်၍လည်း ဗမာကဲ့သို့ ဝတ်စားနေထိုင်ခြင်းကို ဂုဏ်ယူကြသည်။ သူတို့ကို ကုလားခေါ်ခြင်းထက် မြန်မာမူဆလင်ဟုခေါ်ခြင်းကို နှစ်သက်ကြသည်။ ဗမာတို့ကဲ့သို့တိုက်ပုံကိုဝတ်ဆင်ကြသည်။ ဗမာတို့ကဲ့သို့ သူတို့ဘာသာအမည် အီစွတ်၊ ကာဆင်နှင့်ဆက်ပြီး ကိုတင်မောင်၊ ကိုခင်အောင်ဟု ရေးသားခေါ်ဝေါ်ကြသည်။ စင်စစ်အားဖြင့်ဆိုရသော် ယင်းသူတို့သည် ဗမာလူမျိုး၏ နောက်ဆက်တွဲ အင်အားဖြစ်လာသည်။ပြည်နယ်များတွင် နိုင်ငံရေးအခြေအနေအရ အစိုးရကသူတို့၏ ဦးရေကို ဗမာလူမျိုးစာရင်းတွင်ထည့်သွင်းဖော်ပြကြသည်။ မိမိတို့ကို ခင်တွယ်သောသူတို့တွင် မကောင်းသောလက္ခဏာများရှိသလားဟု မေးစရာရှိသည်။ သူတို့သည်္ခမူးယစ်ထုံထိုင်းစေသော အရက်သေစာများကို ရောင်းချခြင်းမရှိ။ သူတို့သည် ဘိန်းဖြူကဲ့သို့ မကောင်းသောအလုပ်များကို အသက်မွေးဝမ်းကြောင်းခြင်းလည်းမရှိ။ စီးပွါးရေးတွင် Monopoly ဟုခေါ်သောထိပ်ပိုင်းမှ ချုပ်ကိုင်ခြင်းလည်းမရှိ။ အိမ်ထောင်ရေးနှင့် ပတ်သက်ပြီး ပြောကြသေးသည်။ ယနေ့ကာလတွင် ကုလားမများကို အခြားသူတို့အိမ်ထောင်ဖက်အဖြစ် ရွေးကောက်သကဲ့သို့ ဗမာအမျိုးသမီးများကိုလည်း ကုလားများကယူကြသည်။ သို့ရာတွင် ယင်းအိမ်ထောင်ရေးသည် ရေရှည်တည်တံ့ခြင်းမရှိကြောင်းကို နှစ်ဖက်စလုံးကသိကြသည်။ သို့ဖြစ်၍ သဘောတူအချင်းချင်းသာယူကြရေးကို အထူးပြုနေကြသည်ကိုတွေ့ရသည်။
(ရောင်ခြည်ဦး)
No comments:
Post a Comment